កាណាដា៖ អត្តពលិកអូឡាំពិកកាណាដា លោកស្រី Charmaine Crooks ត្រូវបានជ្រើសតាំងជាប្រធានស្តីទីនៃបាល់ទាត់កាណាដា ខណៈដែលស្ថាប័នគ្រប់គ្រងបាល់ទាត់មួយនេះកំពុងប្រឈមនឹងការស្វែងរកដំណោះស្រាយទៅលើភាពតានតឹងដែលកើតមានទាំងនៅក្នុងស្ថាប័នបាល់ទាត់បុរស និងបាល់ទាត់នារី។

លោកស្រី Charmaine Crooks បច្ចុប្បន្នមានវ័យ ៦០ឆ្នាំ គឺជាស្រ្តី និងជាបុគ្គលស្បែកពណ៌ដំបូងដែលនឹងចូលខ្លួនមកដឹកនាំបាល់ទាត់កាណាដា ក្រោយពេលលោកស្រីចំណាយពេលជាអនុប្រធានសហព័ន្ធប្រមាណជិត ២ឆ្នាំ ដែលលោកស្រីទទួលតំណែងបន្តពីលោក Nick Bontis ដែលបានប្រកាសលាលែងពីតំណែងកាលពីថ្ងៃចន្ទ។ 

ក្រុមបាល់ទាត់នារីកាណាដា ដែលជាម្ចាស់ជើងឯកអូឡាំពិក ថ្មីៗនេះបានបង្កើនការតវ៉ារបស់ពួកគេជុំវិញបញ្ហាការទទួលបានប្រាក់បៀវត្សរ៍ ជាក់ស្តែង កាលពីពេលថ្មីៗដែលពួកគេពាក់អាវពណ៌ស្វាយដែលសរសេរនៅលើអាវថា "Enough is enough" មុនការប្រកួតបើកឆាកនៃព្រឹត្តិការណ៍ SheBelievesCup កាលពីខែកុម្ភៈកន្លងទៅ។ លោកស្រី Crooks បាននិយាយនៅក្នុងសេចក្តីថ្លែងការណ៍មួយថា៖ "ការងារចំពោះមុខនេះគឺដើម្បីស្ថាប័នមួយនេះ ដើម្បីវិស័យកីឡា និងសម្រាប់អត្តពលិកដែលប្រកួតប្រជែងក្នុងឯកសណ្ឋានរបស់កាណាដា ដែលជារឿងសំខាន់បំផុតជាជាងការប្រកួតប្រជែងផ្សេងៗដែលខ្ញុំធ្លាប់ជួបកន្លងមក"។ 

គួរបញ្ជាក់ថា លោកស្រី Crooks ជាអត្តពលិកដែលធ្លាប់ប្រកួតប្រជែងក្នុងព្រឹត្តិការណ៍អូឡាំពិកចំនួន ៥ផ្សេងគ្នា និងធ្លាប់ឈ្នះមេដាយប្រាក់ម្តងក្នុងព្រឹត្តិការណ៍អូឡាំពិកឆ្នាំ១៩៨៤ ក្នុងនាមជាកីឡាការិនីរត់បណ្តាក់​ ៤x៤០០ម៉ែត្រ៕